Diskon Ageng Jalur Langit Ingkang Asring Dilalekake”

Judhul: “TELUNG PULUH DINA EMAS: Diskon Ageng Jalur Langit Ingkang Asring Dilalekake”

Dening: Pinggir Wiyono, S.Pd., M.Pd.

(Abu Najieb / Santri Lawu)

I. MUKADIMAH (PAMBUKA): GUYONAN “PROMO 10.10”

بِسْمِ اللهِ الرَّحْمَنِ الرَّحِيمِ

الْحَمْدُ لِلَّهِ رَبِّ الْعَالَمِينَ، وَالْعَاقِبَةُ لِلْمُتَّقِينَ… أَمَّا بَعْدُ

Bapak-bapak, Ibu-ibu jamaah rahimakumullah…

Pripun kabaripun? Mugi-mugi iman lan imun kita tansah kajagi.

Bapak-Ibu, jaman sakniki menawi kita mireng angka kembar kados “10.10”, “11.11”, utawi “12.12”, napa ingkang wonten ing pikiran kita? Mesthi kelingan Promo Harbolnas (Hari Belanja Online Nasional) teng toko “oren” utawi toko “ijo”.

Tengah wengi sanggup melek, mantengi layar HP, tangane gatel arep check-out barang ing keranjang amarga wedi kelangan diskon utawi gratis ongkir. Sanggup sikut-sikutan rebutan kuota promo! Niku wajar, amargi menungsa niku remen barang sing murah nanging bathine gedhe.

Nanging, tahukah panjenengan bilih Gusti Allah ﷻ sejatosipun ugi gadhah “Promo 10 Dinten” ingkang bathine jauh luwih ageng, mboten namung atusan ewu, nanging saged nebus tiket swarga?

Sayangipun, nalika “Promo Langit” niki dibikak, tiyang-tiyang malah padha pules tilem, utawi sibuk ngurusi urusan donya ingkang mboten wonten telase.

Pramila, dinten menika kita badhe sinau saking para generasi Salafush Shalih (generasi paling sae umat niki), kados pundi caranipun piyambakipun mulyakaken wekdal-wekdal “Promo” kasebut.

II. INTI MATERI: BEDHAH DAWUH ABU UTSMAN AN-NAHDI

Wonten ing kitab Mukhtashar Qiyamul Lail wa Qiyam Ramadhan wa Kitab Al-Witr (hal. 247) anggitanipun Al-Imam Al-Marwazi rahimahullah (wafat: 294 H), dipun cathet dhawuh saking ulama Tabi’in, Abu Utsman An-Nahdi rahimahullah (wafat: 100 H). Panjenenganipun ngendika:

كَانُوا يُعَظِّمُونَ ثَلَاثَ عَشَرَاتٍ: الْعَشْرَ الْأَخِيرَ مِنْ رَمَضَانَ، وَالْعَشْرَ الْأُوَلَ مِنْ ذِي الْحِجَّةِ، وَالْعَشْرَ الْأُوَلَ مِنَ الْمُحَرَّمِ

Artosipun:

“Biyen, para generasi Salaf (sahabat lan tabi’in) iku mulyakake (ngagungake) 10 dina ing telung panggonan: (1) 10 dina pungkasan wulan Ramadhan, (2) 10 dina awal wulan Dzulhijjah, lan (3) 10 dina awal wulan Al-Muharram.”

Bapak-Ibu, tembung “mulyakake” ing mriki mboten ateges ndamel tumpeng, masang spanduk, utawi nyumet kembang api. “Mulyakake” miturut para ulama Salaf inggih menika ngebaki dinten-dinten kasebut kanthi ibadah ingkang maksimal (puasa, shalat, dzikir, lan sedekah).

Mangga kita udari setunggal baka setunggal “Telung Puluh Dina Emas” menika mawi dalil lan pemahamanipun:

1. Sedasa Dinten Pungkasan Ramadhan (Mburu Lailatul Qadar)

Kados ingkang asring kita bahas, 10 dinten pungkasan wulan Ramadhan niki punjering (puncak) kasaenan. Wonten ing dalemipun wonten dalu ingkang langkung sae tinimbang 1.000 wulan.

Menawi wulan Ramadhan niku diibaratake balapan, 10 dinten pungkasan niki garis finish-e. Generasi salaf menawi mlebet wekdal niki, piyambakipun ninggalaken kasur, ninggalaken urusan bisnis sakedhap kagem I’tikaf ing masjid.

Kanjeng Nabi ﷺ nggugah garwa-garwane, nyingsingake sabuke, lan ngurip-urip wengi kanthi munajat. Niki diskon pangapunten dosa ingkang paling ageng ing dalem setahun!

2. Sedasa Dinten Awal Dzulhijjah (Dinten Paling Ditresnani Allah)

Bapak-Ibu, menawi 10 pungkasan Ramadhan niku unggul ing wengine (amargi Lailatul Qadar), mila 10 dinten awal Dzulhijjah (wulan Besar) niki unggul ing awan/siyange. Malah, dinten-dinten niki kasebat minangka dinten ingkang paling ditresnani dening Allah ing alam donya.

Dalil Ilmiyah:

Rasulullah ﷺ paring sabda:

مَا مِنْ أَيَّامٍ الْعَمَلُ الصَّالِحُ فِيهِنَّ أَحَبُّ إِلَى اللَّهِ مِنْ هَذِهِ الْأَيَّامِ الْعَشْرِ

“Ora ana dina-dina ing ngendi amal shalih luwih ditresnani dening Allah tinimbang (amal shalih) ing 10 dina (awal Dzulhijjah) iki.” (HR. Bukhari no. 969).

Malah para sahabat ngantos tanglet: “Sanajan mengalahkan ganjaran Jihad fisabilillah, ya Rasulullah?” Nabi mangsuli: “Iya, sanajan ngalahake jihad. Kejaba wong sing budhal perang nggawa nyawa lan bandhane, banjur ora bali maneh (mati syahid).”

Nanging kasunyatanipun jaman sakniki? Tiyang-tiyang nggih biasa mawon ngadhepi 1-9 Dzulhijjah. Padahal disunnahaken ngathah-ngathahaken Takbir, Tahlil, Tahmid, lan pasa (mliginipun pasa Arafah ing tanggal 9 Dzulhijjah). Mugi-mugi kita saged ngisi wekdal niki kanthi nglatih santri lan kaluwarga supados kulina tumindak sae, mboten nunggu wulan Ramadhan kemawon.

3. Sedasa Dinten Awal Al-Muharram (Wulan Gusti Allah)

Nah, niki ingkang asring dados salah kaprah ing masarakat kita. Wulan Muharram (utawi wulan Sura ing pananggalan Jawi).

Kathah tiyang ingkang nganggep wulan Sura niku wulan sing angker, wulan sial. Mboten wani rabi, mboten wani mbangun omah, mboten wani lunga adoh, amarga wedi keneng balak. Niki kapitayan (kepercayaan) ingkang klentu lan mboten wonten tuntunanipun saking Kanjeng Nabi ﷺ!

Malah kosok wangsulipun, 10 dinten awal Muharram niki wulan ingkang suci. Nabi nyebat wulan niki minangka Syahrullah (Wulane Gusti Allah).

Dalil Ilmiyah:

Rasulullah ﷺ paring sabda:

أَفْضَلُ الصِّيَامِ بَعْدَ رَمَضَانَ شَهْرُ اللَّهِ الْمُحَرَّمُ

“Sak becik-becike pasa sakwise Ramadhan yaiku pasa ing wulane Allah, Al-Muharram.” (HR. Muslim no. 1163).

Puncakipun wonten ing tanggal 10 Muharram (Dinten Asyura). Pasa ing dinten kasebut saged nglebur dosa kita setaun ingkang sampun kapungkur. Para salaf rumiyin ngebaki wekdal niki kanthi pasa lan sedekah, sanes malah nyirami keris utawi nunggu metune kebo bule.

III. KESIMPULAN (DUDUTAN) LAN PANUTUP

Jamaah rahimakumullah,

Saking pitedahipun Abu Utsman An-Nahdi menika, kita saged mendhet dudutan:

1. Pinter Milih Wektu Investasi: Kados dene manungsa ingkang cerdas nalika milih wekdal flash sale, kita ugi kedah cerdas milih 30 dinten emas niki (10 Akhir Ramadhan, 10 Awal Dzulhijjah, 10 Awal Muharram) kagem nambang pahala.
2. Ngaji Dhisik Sadurunge Tumindak: Adat istiadat ingkang nalisir saking syariat (kados nganggep sial wulan Muharram) kedah dipun tilaraken. Kita derek pemahamanipun generasi Salafush Shalih.
3. Istiqomah: Kasaenan niku mboten kedah dipun tumpuk ing wulan Ramadhan thok. Gusti Allah ingkang kita sembah ing wulan Ramadhan, inggih Gusti Allah ingkang ugi mirsani kita ing wulan Dzulhijjah lan Muharram.

Donga Panutup:

Ya Allah, Paduka paringana kawula yuswa ingkang barokah, saengga kawula saged pinanggih kaliyan dinten-dinten ingkang Paduka mulyakaken. Bukaken manah kawula supados saged ngebaki wekdal-wekdal kasebut kanthi amal shalih, lan tebihaken kawula saking tumindak ingkang muspro sarta kesyirikan.

رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ

وَصَلَّى اللَّهُ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ وَسَلَّمَ

وَالسَّلاَمُ عَلَيْكُمْ وَرَحْمَةُ اللَّهِ وَبَرَكَاتُهُ